Spurt og svarað - Yorkshire Terrier deild

Til styttinga er Yorkshire Terrier deild stundum kölluð Yorka deild eða YTdeild.

Fyrir hverja er Yorkshire Terrier deild?
Yorka deildin er fyrir alla eigendur allra Yorkshire Terrier hunda sem ættbókarfærðir eru innan HRFÍ og einnig geta áhugamenn um tegundina skráð sig í deildina en þeir geta ekki boðið sig fram í stjórn nema að vera skráðir fyrir Yorkshire Terrier hund. Eigendur Yorka innan HRFÍ færast sjálfkrafa í Yorkadeild og þurfa því ekki að skrá sig í hana sérstaklega eins og þurfti áður fyrr.

Hvað gerir Yorka deild?
Hlutverk hennar er að að standa vörð um ræktun viðkomandi hundakyns, að vera ráðgefandi og að miðla fræðslu. Deildin skipuleggur einnig félagsstarf í kring um sína tegund.

Hvað er ræktunarráð og fyrir hvern er það?
Ræktunarráð er fyrir félagsmenn HRFÍ sem hafa hug á að setja á tíkina sína og vilja fá ráð varðandi hvaða hundur/hundar henta. Athugið að aðeins hundar sem hafa fengið dóm á hundasýningu koma til greina í vali ræktunarráðs, á það bæði við um tík og hund.
Ræktunarráð er ráðgefandi aðili um allt er viðkemur ræktun, eðli og umhirðu viðkomandi hundakyns. Ennfremur ber ræktunarstjórn að fræða um sögu kynsins, heilbrigði og uppruna. Félagsmenn HRFÍ sem vilja fá ráð ræktunarráðs um hvaða rakka skuli nota á tík sína skulu senda ræktunarráð skriflega umsókn (fyrirspurn) í síðasta lagi 2 mánuðum fyrir lóðarí tíkarinnar. Ræktunarráð skal leitast við að taka til meðferðar innan mánaðar þær skriflegu fyrirspurnir sem berast varðandi ræktun og undaneldi og benda á 3 hunda, sér það mögulegt en það er alfarið ákvörðun tíkareigandans hvort hann notar einhvern af þeim þrem hundum sem mælt er með eða einhvern annan (ekki skylt að nota þá). Gera má ráð fyrir lengri afgreiðslufresti berist fyrirspurnir í jólaleyfi eða sumarleyfi. Ábending ræktunarstjórnar gildir aðeins fyrir eina pörun og aðeins í 9 mánuði eftir dagsetningu pörunarumsóknar.

Hvað er gert á ársfundi deildar?
Á ársfundi er farið yfir það sem deildin stóð að á líðandi ári, skýrsla stjórnar lesin upp, stjórn kosin, valið í nefndir, viðurkenningar/bikarar afhentir (sbr. Presstop's bikarinn sjá neðar). Á þennan fund eru allir meðlimir Yorka deildar velkomnir.

Hvað er gert á deildarfundi deildar?
Deildarfundir eru meira þar sem fólk hittist og ræðir sína tegund. Reynt er að vera með uppákomur sem snúa að tegundinni t.d. fyrirlestur og önnur fræðsla þegar hægt er. Fólk getur rabbað og komið með tillögur hvað það vill láta gera fyrir tegundina. Farið er yfir það helsta sem er í gangi á fulltrúaráðsfundum og ef eitthvað nýtt er að koma í ljós með okkar tegund. Á þessa fundi eru allir meðlimir Yorka deildar velkomnir. Hvetjum nýliða til að mæta á þessa fundi og kynnast fleira fólki sem á sömu tegund og taka þátt í skemmtilegum uppákomum.

Hvað er gert á fulltrúaráðs fundum og fyrir hvern eru þeir?
Á þessum fundum mæta 1-2 fulltrúar úr stjórn úr öllum deildum HRFÍ þar sem stjórn HRFÍ taka fyrir málefni sem snúa að deildununum, tegundum þeirra og rekstur félagsins. Þessir fundir eru aðeins ætlaðir stjórnarmeðlimum og eru ekki auglýstir eins og hinir fundirnir á deildarsíðum.

Hvað er Presstops´s bikarinn?
Presstop´s farands bikarinn er viðurkenning frá Presstop´s ræktun í Svíþjóð sem stigahæsti Yorkshire Terrier ræktandi hvers árs hlýtur. Bikarinn er afhentur á ársfundi deildarinnar ár hvert. Til að sjá nánari upplýsingar um bikarinn og hvernig stigin eru reiknuð smellið hér

Af hverju eru engar heilsufarskröfur hjá tegundinni?
Tegundin okkar er sem betur fer mjög heilsuhraust og arfgengir sjúkdómar ekki vandamál. Fólk sem hefur áhuga hefur farið með hunda sína í augnskoðun en það er ekki skylda þar sem augnsjúkdómar eru ekki vandamál í tegundinn, enginn hundur hefur greinst. Augnskoðun er amk 1-2 sinnum á ári og kostaði 5.720kr árið 2010.

Hvað er FCI?

• FCI er stytting á The Fédération Cynologique Internationale og er Alþjóðleg Samtök Hundaræktarfélaga staðsett í Belgíu. FCI samræmir reglur hundaræktarfélaga milli landa, skráir ræktunarnöfn, gefur út alþjóðlega meistaratitla, sér um ræktunarreglur ofl. FCI er í samstarfi við (nær) öll lönd heims og því eru hundar með FCI ættbók viðurkenndir sem ættbókarfærðir hundar um allan heim og hafa aðgang að stórum hundasýningum í þessum löndum og eigendur einnig að öllu félagsstarfi aðal hundaræktarfélagsins í hverju landi. Heimasíða FCI er www.fci.be
• Bendum á að nýtt félag sem kallast FEDERACIÓN CANINA INTERNACIONAL er ekki sama félag og ekki viðurkennt af FCI. Þetta félag notar sömu skammstöfun og FCI hjá t.d. félögum sem hafa ekki fengið inngöngu í hið rétta og upprunalega FCI.

Ætti ég að skrá mig í HRFÍ?

• Já hiklaust ef þú átt hund sem er með ættbók innan HRFÍ. Að vera félagi í HRFÍ gefur þér tækifæri á að hafa áhrif á þitt félag, bjóða þig fram í stjórn í þinni deild eða í aðalstjórn HRFÍ, kjósa í stjórn og um ýmis málefni í þinni deild, sýna þinn hund á sýningum HRFÍ, keppt í hundafimi, hlýðni og spori og fengið titla á hundinn þinn sem eru alþjóðlegir, lært að verða sýningarritari, hringstjóri og byrjað að vinna að því að verða hundadómari.
• Einnig ferð þú þá inn á félagalista deildarinnar fyrir þína tegund og hefur þú því beinni aðgang að félagsstarfi deildarinnar.
• Félagsgjald árið 2010 er 6.700kr á ári eða 9.500kr fyrir hjónagjald. Félagsaðild fylgir afsláttarkort frá HRFÍ, sem veitir afslætti í ýmsum verslunum. Hjónagjaldi fylgir sjálfkrafa 1 afsláttarkort en hægt er að fá annað kort án aukagjalds en biðja þarf um það sérstaklega.

Til hvers eru hundasýningar?

• Hundasýningar eru til þess að fá dóm á hund.
• Dómarinn fer eftir ræktunarmarkmiði fyrir tegundina (skrifleg lýsing á tegundinni), gefur hundinum einkunn eftir því hversu vel hundurinn samrýmist ræktunarmarmiðinu og hversu góðu formi hundurinn er í.
• Ræktunarsýningar eru því líka til að leiðbeina um ræktun á þeirri tegund.

Til hvers eru ræktunarmarkmið eða ræktunarstaðlar ?

• Ræktunarmarkmiðin er skrifleg lýsing á hundakyninu og var búin til til þess að hver tegund fyrir sig haldi sama útliti og eiginleikum.
• Ræktunarmarkmiðin eru gerð til þess að fleiri en ein manneskja geti haldið utan um tegundina og haldið tegundinni í þeim staðli sem hún var búin til í.
• Ef ræktendur fara ekki eftir ræktunarmarkmiðum þá er hætta á því að hundarnir líkist ekki lengur sinni tegund, frekar annari tegund eða blendingum. Er kannski ekki einu sinni með rétta eiginleika. Þá er varla hægt að segja að þetta sé sama tegund og hún var í upphafi. Til að koma í veg fyrir að tegundir hverfi á þennan hátt eru ræktunarmarkmið notuð..
• Ef þú átt hund sem er af ákveðinni tegund þá vilt þú kannski að í framtíðinni geti einhver manneskja eignast eins góðan og fallegan hund og þú átt. Það er aðeins hægt ef farið er eftir ræktunarmarkmiðunum því annars verða hundarnir af þessari tegund ekkert líkir þínum í framtíðinni.
• Ræktunarmarkmið Yorkshire Terrier: Íslenska - Enska